尋日十點出門口，無乜雨，但係揍住個Ｂ唔方便，所以都撘的士去搵囡囡大人。

明明約十點三睇醫生，等到十點九先到啊女，真係可惡！

個醫生話無乜野既，唔使擔心，但我都係覺得去醫院睇真啲好！所以都叫醫生寫紙轉介去聯合婦科。

同個女食完早餐就坐巴士去咗觀塘再轉車去聯合，排期排到九月囉！

一點三先返到舖頭，JESSIE未到，佢仲整緊頭，要晏啲先到！

我幫佢駁完，真係好靚，原本$540，我收咗佢$450。

個女陪足我成日，食完飯就一齊走，我去到鑽石山站落車，佢自己返屋企，我就帶小Ｂ返慈雲山。

十一點半，個仔終於肯瞓，我就即刻瞓，因為真係好攰，但個仔好似醒咗兩次，但我都無起到身，因為真係攰到唔想起身，好在有個好老公，雖然佢十二點幾先返到，但都幫我手揍Ｂ等我有覺好瞓，真係抵鍚！

老公，我知你好辛苦架！但為咗頭家，你要努力呀！我會永遠都咁愛你咁鍚你架！

前日我終於帶咗架學行車返舖頭，因為啊Wing成日話驚Ｂ爺會喺ＢＢ車度跌落嚟，因為Ｂ爺真係好百厭，成日企係架車度！

點知我超忙，一開舖就做到收舖咁濟，啊Wing就大部份時間都擺咗啊仔爺喺架學行車度，除咗仔爺瞓咗先放佢喺ＢＢ車，仲要係對面泳衣舖個女仔揍Ｂ爺瞓既！

啊Mon五點度嚟咗駁髮，佢見到啊Ｂ爺咁，都話Ｂ爺成個棄嬰咁，我個心真係好痛！

尋日一落到街就見天陰陰，都驚有雨，但都無返轉頭攞“姐”，一上到小巴無幾耐就落好大雨，不過都好彩，落車時就微微雨啫，但Ｂ爺瞓咗，我就問一對情侶，可唔可以“姐”我ＢＢ，我哋要過對面馬路搭的士，個男人幾好呀，佢自己俾雨淋，都俾把“姐”個女朋友“姐”我同ＢＢ過馬路囉！

我都覺得唔好意思，就同個女仔講咗好多句唔好意思，個女仔就話唔緊要！

又咁啱個的士佬諗住食飯都肯車我返西九，真係Good呀！

尋日係星期六，老公要上堂，我帶Ｂ爺返工，Wing一見到個樣已經有啲唔高興咁問：Ｂ，你無假放咩？我就話爸爸要返學。

又再係一開舖就忙，Wing又再將Ｂ爺放喺學行車度，仲要放佢喺我同佢間舖中間個度防煙門出面，Ｂ爺喊佢又唔理，搞到Ｂ爺喺咁喊住叫媽媽，一路拍我間舖啲玻璃，我做咗四個客，一路都係咁囉！

高Ｂ叫我沖支奶俾Ｂ爺，Wing只係餵咗兩安就俾返我，話Ｂ爺唔飲，其實我覺得佢都無心機餵！

終於做完個客，我頂唔順自己接返個仔入嚟，如果要由得Ｂ爺坐學行車喊，我放佢喺我舖頭就得啦！使乜好似個棄嬰咁呀？！

接住又有客話要搵我駁髮，但我同個客講，我要理咗ＢＢ先，咁我揍咗Ｂ爺瞓就幫個客駁啦！就同個客吐苦水，我又唔係無俾錢，我係俾錢人哋幫我睇ＢＢ都搞到我個仔成個棄嬰咁！我真係好後悔帶架學行車返嚟呀！

連我個客都話佢頭先等既時候都見到我Ｂ爺喺出面喊到乜咁都無人理啦！

個客走咗之後，我同高Ｂ講我有啲唔開心，因為咁、咁、咁，
高Ｂ就問我：你無同佢講明要做啲乜既咩？
我話：有呀！但都搞成咁！唉！
高Ｂ就話：佢咁都好意思收你錢既？！
我話：平日都係多數同場啲人或者你同你媽咪抱住Ｂ爺啦！我一做完嘢又會自己揍返，但我都會照俾錢啊Wing，但攞咗架學行車返嚟就搞到Ｂ爺成個棄嬰咁，我真係好內疚囉！
高Ｂ話：喺喎！佢係唔會理嗰喎！

七點老公嚟到接我哋，我哋去大快活食飯，食完我就同老公講哂出嚟，但佢都無俾反應我！

返到慈雲山，就去咗中心，佢又自己一個人走咗去，我打咗好多次電話都搵唔到佢，真係有啲嬲呀！

我哋去屈臣士買完嘢，交完媽媽既電話費，就去７仔交埋租$2164，入埋錢找匯豐條咭數，仲差匯豐$307.？

返到屋企都十點啦，個女都未返，十點幾我就SEND短訊閙佢，十點半就返到嚟就話因為避雨所以遲咗返嚟，我哋呢度無雨落囉！佢話旺角好大雨！我真係唔信囉！我覺得只係佢想玩夜啲至會作個避雨既籍口出嚟！

佢一返嚟就返入房，沖完涼就瞓覺，完全唔覺得自己有錯，佢唔問過就攞咗部PSP出街玩又無錯，應承十點返，十點半先返到又無錯！

我真係唔知有乜方法可以敎好佢呀！